Debati në Kuvend, Berisha: S’doni të pyes për Ulsiun, Balla: Djalli flet për Biblën

Mazhoranca dhe opozita kanë vijuar debatin këtë të hënë lidhur me rregullat mbi mënyrën sesi do të trajtohet raportimi i institucioneve të drejtësisë. Debati ka qenë i përqendruar te zhvillimi i pyetjeve dhe drejtimi i tyre nga ana e deputetëve për institucionet e drejtësisë.

Berisha: E vërteta është që ajo që citoni ju është jashtë kontekstit, sepse këto institucione nuk kanë ekzistuar në kohën që ju përmendni. Së dyti, opozita ka pasur një taktike për të hequr dorë nga pyetjet. Së treti, nga viti 2022 e këtej pyetjet janë bërë si duhet. Në rregulloren e parlamenteve, deputetët kanë të drejtë të bëjnë pyetje orale; kjo është e vërtetë në çdo asamble parlamentare ndërkombëtare. Pse ky kuadër? Ju e keni këtë se keni frikë. Ju jeni të lidhur, edhe keni dosje të tjerëve. Bëni kompromis mes të lidhurve për të mbuluar. Sepse Ulsiu nuk do që unë të pyes për dy kostumet që i porositi Altin Hajri. Nuk do të pyesë për bisedat me Mario Çelën. As ai nuk do.

Balla: Fjala e deputetit parafolës është sikur t’i kërkoje djallit të interpretojë Biblën. Tani të shkojmë te shinat. E kam për deputetët e rinj: kur keni ardhur më 12 shtator, keni gjetur këto tre libra që e rregullojnë këtë çështje. Ju them se libri i parë është Kushtetuta, Rregullorja dhe tradita parlamentare. Rregullorja përcakton qartë sesi bëhet procesi i raportimit. Po, është e vërtetë që në 2023 dhe 2024 janë bërë gabime.