Deklaratat e Trump për energjinë, Gjermania i përgjigjet kandidatit për president

Ministria e Jashtme e Gjermanisë reagoi pas deklaratës së kandidatit republikan presidencial të SHBA-së, Donald Trump, rreth emigrantëve që hanë kafshë shtëpiake në një postim në platformën sociale X të mërkurën, ndërsa hodhi poshtë kritikat e tij ndaj politikës gjermane për energjinë.

Trump tha në debatin e së martës me zëvendëspresidenten demokrate Kamala Harris se shumë emigrantë nga Haiti në Springfield, Ohio, po vidhnin kafshët shtëpiake të banorëve ose po merrnin kafshë të egra nga parqet për ushqim.

Ai gjithashtu sulmoi përpjekjen e Harris për ta çuar vendin drejt asaj që ajo thotë se do të jetë një përzierje më e larmishme dhe e qëndrueshme e burimeve të energjisë, duke thënë se Gjermania ishte përpjekur dhe dështoi të hiqte dorë nga karburantet fosile.

“Të pëlqen apo jo: sistemi energjetik i Gjermanisë është plotësisht funksional, me më shumë se 50% burime të rinovueshme. Dhe ne po mbyllim – jo duke ndërtuar – centrale qymyri apo bërthamorë. Qymyri do të jetë jashtë rrjetit deri në vitin 2038,” tha Ministria e Jashtme në një postim në X, i njohur më parë si Twitter.

Ministria e Ekonomisë, e cila drejtohet gjithashtu nga partia e të Gjelbërve, ripostoi postimin, duke thënë: “Uzinat e reja të energjisë me qymyr? Nuk ka mundësi!”

Kancelari Olaf Scholz nuk e ka mbështetur drejtpërdrejt Harris, por e vlerësoi atë në korrik si një “politikane kompetente dhe me përvojë që e di saktësisht se çfarë po bën” dhe që mund të fitojë fare mirë zgjedhjet në SHBA.

Gjermania ishte një fokus i Trump gjatë mandatit të tij si president 2017-21 për shkak të suficitit tregtar me Shtetet e Bashkuara dhe shpenzimeve të ulëta për mbrojtjen.

Trump zotohet të vendosë tarifa më të larta mbi importet nëse zgjidhet dhe të kushtëzojë mbështetjen e SHBA për anëtarët e aleancës ushtarake të NATO-s.