Delfinët refugjatë nga Ukraina argëtojnë fëmijët rumunë

Në qytetin-port të Detit të Zi të Konstancës, trajnerët rumunë dhe ukrainas kanë gjetur gjuhën e tyre të përbashkët në dashurinë për gjitarët e tyre, të cilët tani janë refugjatë nga lufta.

Delfinët (Kiki, Maya, Marusia dhe Veterok) dhe luanët e detit (Aleks, Mary dhe Zosya), së bashku me trajnerët e tyre ukrainas, kanë gjetur shtëpinë e tyre të re në Rumani, ku tani ata sërish po argëtojnë fëmijët, shkruan REL.

Vitin e kaluar, këta gjitarë, së bashku me trajnerët dhe mjekët e tyre, u detyruan që të largoheshin nga shtëpitë në qytetin lindor ukrainas të Harkivit, për shkak të sulmeve ruse.

Pavarësisht se në fillim kishte pengesa për shkak të gjuhës, trajnerët rumunë dhe ukrainas gjetën gjuhë të përbashkët në dashurinë e tyre për këta gjitarë.

“Ne ja kalojmë shumë mirë me njëri-tjetrin, flasim të njëjtën ‘gjuhë’. Është gjëja më e mirë që mund të ketë ndodhur për delfinët tanë”, tha një prej trajnerëve.