Sekretari i Përgjithshëm i NATO-s, Mark Rutte, deklaroi këtë të premte se Aleanca do të forcojë praninë e saj ushtarake në rajonin e Baltikut, pas dyshimeve për një akt sabotimi ndaj kabllit nënujore të energjisë EstLink 2, që lidh Estoninë me Finlandën.

Deklarata e Rutte erdhi pas një bisede me presidentin finlandez, Alexander Stubb, ku diskutuan mbi dëmtimin e kabllit. Finlanda dyshon se një cisternë ruse mund të jetë përgjegjëse për incidentin, që po konsiderohet si një akt i mundshëm sabotimi.

“Unë shpreha solidaritetin dhe mbështetjen time të plotë për Finlandën dhe Estoninë,” shkroi Rutte në rrjetin social X. Ai shtoi se NATO do të marrë masa për të garantuar sigurinë e infrastrukturës kritike në rajon.

Incidenti ka mobilizuar jo vetëm NATO-n, por edhe Bashkimin Evropian. Si Finlanda, ashtu edhe Estonia, kanë marrë mbështetje të plotë nga partnerët evropianë dhe aleatët transatlantikë për hetimin dhe përballimin e situatës.

Kablli EstLink 2 është një pjesë thelbësore e infrastrukturës energjetike, që garanton lidhjen dhe furnizimin me energji ndërmjet dy vendeve baltike. Hetimet për rrethanat e incidentit po vazhdojnë, ndërsa tensionet në rajon mbeten të larta.

LEXONI GJITHASHTU:

• Dyshime për sabotim pas dëmtimit të kabllos nënujore elektrike në Detin Baltik
• Zakharova: SHBA dhe Britania të përfshirë në sabotimin e Rrjedhës së Veriut