Dëmtohet skulptura historike e “Elefantit të Vogël” në Romë, ministri Giuli: Akt absurd barbar

Një elefant mermeri i punuar nga skulptori i famshëm italian Gian Lorenzo Bernini u dëmtua nga persona të paidentifikuar. Mësohet se dhëmbët e elefantit u gjetën të thyer.

Dëmi u zbulua të hënën në mbrëmje dhe policia tha se do të shqyrtojë pamjet filmike nga Piazza della Minerva për të përcaktuar nëse dëmi ishte rezultat i vandalizmit apo i shkaktuar nga javë të tëra reshjesh jashtëzakonisht të dendura.

Ministri i Kulturës i Italisë, Alessandro Giuli, theksoi se besonte që veprimi ishte i qëllimshëm, duke thënë se statuja e shekullit të 17-të, e cila mbështet një obelisk të lashtë egjiptian, ra viktimë e një akti absurd barbar.

“Është e papranueshme që edhe një herë trashëgimia artistike dhe kulturore e kombit të pësojë dëme kaq serioze”, tha ai në një deklaratë.

Kjo nuk është hera e parë që skulptura, e njohur si Elefantino (elefanti i vogël), është dëmtuar. Në nëntor 2016, maja e të njëjtit dhëmb u gjet e thyer në mënyrë të ngjashme.

Skulptura, e krijuar në vitin 1667 nga Ercole Ferrata bazuar në një dizajn të Berninit, ndodhet në një distancë të shkurtër nga Panteoni, një nga atraksionet turistike më të njohura të Romës.