Dështon iniciativa për arsimin, 1 program studimi prioritar zgjedhur nga 4 studentë

Ndryshe nga një vit më parë ku universiteti i Korçës kishte 10 programe studimi prioritare, këtë vit do të ketë vetëm një, e cila ndodhet në fakultetin e bujqësisë me vetëm 4 kuota studentësh.

Ky program studimi i vendosur si prioritar dhe përfitues i bursës është inxhinieria agronomike. Një gjë e tillë është bërë me dije nga drejtori i kurrikulave pranë këtij universiteti Artur Prifti.

“Nëpërmjet një shkrese zyrtare na është njoftuar që për një program studimi do të ketë 4 kuota, pra 4 studentë që do të përfitojnë pagën minimale prej 400 mijë lek te vjetra. Për programet e tjera nuk jemi njoftuar, do presim në vijim për njoftime”, tha Prifti.

Sipas Priftit, këtë vit akademik për herë të parë në historinë të këtij universiteti do të ketë një program studimi të përbashkët me universitetin politeknik të Tiranës, atë të inxhinieri informatike.

“Për këtë vit është programi i ri inxhinieri informatike, është program i përbashkët me universitetin e Tiranës, ka goxha interes, do plotësohet 100 besoj me raundin e dytë, ndryshe nga vitet e tjera këto programe janë në rrugë të mirë. Programi inxhinieri informatike përfshin pedagogë nga dy universitetet, në përfundim të dy viteve të para, studentet më notë me të mira, do marrin diplomë të dyfishtë”, u shpreh ai.

Që në vitin 2022, Ministria e Arsimit ndërmori iniciativën për të mbështetur me bursë maturantët që do të zgjidhnin programet prioritare si bujqësia, mësuesia apo edhe disa degë të inxhinierisë, por fakti tregon se kjo nismë nuk rezultoi pozitive.

LEXONI GJITHASHTU:

• Kreu veprime të turpshme me të mitura, lihen në burg 56-vjeçari në Korçë
• Aksident në aksin rrugor Korçë-Qafë e Qarrit, plagosen dy persona