Dështon sërish seanca ndaj ish-truprojës së Saimir Tahirit

Ka dështuar për të disatën herë seanca për Hekuran Markun, ish-truprojën e ish-ministrit të Brendshëm, Saimir Tahiri.

Teksa prej më shumë se një muaji kanë përfunduar konkluzionet e organit të akuzës dhe pritej fjala e mbrojtjes së të pandehurit e më pas vendimi i togave të zeza të GJKKO-së, edhe këtë të mërkurë seanca dështoi, për shkak se mbrojtja kishte bërë kërkesë për shtyrje.

Ndërkohë më herët, Gjykata e Posaçme ka pranuar kërkesën e Hekuran Markut për gjykim të shkurtuar. Ai akuzohet për trafik narkotikësh në kuadër të grupit të strukturuar kriminal.

Për shkak të gjykimit të shkurtuar, nëse Marku do të dënohet, i zbritet 1/3 e dënimit, ndërsa SPAK kërkoi 12 vite heqje lirie. Ndaj tij nisën hetimet si pjesë e një grupi kriminal, bashkë me ish-truprojën tjetër të Saimir Tahirit, Agustin Dedën.

Më 1 prill, Marku u ekstradua nga Gjermania për t’u përballur me GJKKO me akuzat e ngritura nga SPAK. Marku e Deda akuzohen se janë përfshirë në trafikun e drogës, të zbuluar në kuadër të hetimeve nga operacioni i koduar “Shpirti”.

LEXONI GJITHASHTU:

• SPAK kërkon 12 vite burg për ish-truprojën e Tahirit
• GJKKO pranon kërkesën për ish-truprojën e Tahirit për gjykim të shkurtuar