Digjet fusha e plehrave në Vlorë, dyshohet për zjarrvënie të qëllimshme

Fusha e mbetjeve urbane në Vlorë është përfshirë nga flakët, duke shkaktuar tym dhe ndotje në të gjithë zonën e ish-Fushës së Aviacionit.

Zjarri ka nisur që prej orës 7:30 të mëngjesit dhe dyshohet se është i qëllimshëm. Këtë variant e konfirmoi edhe kryetari i Bashkisë së Vlorës, Dritan Leli.

“Për 20 vjet, që këtu digjeshin plehra dhe askush nuk kujtohej për këto plehra, ndërsa sot e konsiderojnë një incident dhe policia është duke gjetur shkaktarët. Thuhet zjarrvënie e qëllimshme dhe kjo u takon organeve të rendit ta gjejnë dhe ta thonë”, theksoi ai.

Që prej konstatimit të zjarrit 7 automjete zjarrëfikse po veprojnë në zonë. Janë më tepër se 25 efektivë të cilët janë angazhuar në terren. Krahas tyre janë edhe personel i Bashkisë së Vlorës.

Zjarri ka përfshirë kryesisht mbetje plastike, të cilat po digjen duke alarmuar edhe banorët e zonave përreth, nga era e rëndë dhe ndotja mjedisore që mund të shkaktohet.