Diplomacia amerikane në alarm: Po rritet ndjesia anti-SHBA në botën arabe

Administrata Biden ka marrë një paralajmërim të fortë nga diplomatët amerikanë në botën arabe, se mbështetja e fuqishme që po i jep fushatës shkatërruese të Izraelit në Gaza po shkakton humbje të mbështetjes tek Shtetet e Bashkuara për të paktën një gjeneratë.

Kështu thotë një kabllogram diplomatik i siguruar nga CNN, në të cilin shprehet shqetësimi i zyrtarëve amerikanë për rritjen e zemërimit ndaj Amerikës, që kulmoi menjëherë pasi Izraeli nisi operacionet kundër Hamasit, pas sulmit më 7 tetor të grupit terrorist që la rreth 1.400 izraelitë të vrarë.

“Po humbasim rëndë në hapësirën e mesazheve të betejës”, thuhet në një kabllogram të Ambasadës së Shteteve të Bashkuara në Oman, që i referohet bisedimeve të zhvilluara nga diplomatët me kontaktet e tyre të moderuara në vendin arab.

Mbështetja e fortë si materiale edhe morale e Uashingtonit për veprimet e Izraelit po shihet si një mbështetje për krime të mundshme lufte – paralajmëron kabllogrami.

Mesazhi i ambasadës është shkruar nga zyrtari i dytë më i lartë i Shteteve të Bashkuara në Muskat dhe i është dërguar Këshillit të Sigurisë Kombëtare në Shtëpinë e Bardhë, CIA-s dhe FBI-së.

Edhe pse është vetëm një mesazh i një ambasade rajonale, ai ofron një këndvështrim mbi alarmin për rritjen e ndjesisë anti-amerikane në Lindjen e Mesme.

Një tjetër kabllogram i siguruar nga CNN nga ambasada amerikane në Kajro citon një koment në gazetën shtetërore egjiptiane, ku thuhet se, “mizoria dhe shpërfillja e presidentit Biden tejkalon atë të të gjithë presidentëve të mëparshëm amerikanë”.