Diplomacia në lëvizje për Gazën: Irani paralajmëron Izraelin, kërkesa e SHBA

Përmes kanaleve të OKB-së, Irani ka paralajmëruar Izraelin që të mos kryejë operacionin tokësor në Gaza. Diplomatët e Teheranit deklarojnë se nuk e dëshirojnë një përshkallëzim të mëtejshëm dhe nënvizojnë se do të ndërhyjnë në rast të një ofensive.

Në Katar, një zyrtar i lartë i Hamasit u takua me ministrin e Jashtëm iranian, por mbi bisedimet nuk janë bërë publike detajet.

Irani është përfolur se qëndron prapa sulmit të fundit të Hamasit, por inteligjenca amerikane ka deklaruar se nuk ka prova të forta për të mbështetur një pistë të tillë.

Aleatja e ngushtë e Republikës Islamike, lëvizja Hezbollah në Liban, ka shkëmbyer zjarr me ushtrinë izraelite në ditët e fundit.

Ndërkohë, sekretari amerikan i Shtetit, Antony Blinken po përpiqet të gjejë një zgjidhje diplomatike të konfliktit, teksa vazhdon turin e tij në Lindjen e Mesme.

Për të paralajmëruar si Iranin edhe Hezbollahun, Shtetet e Bashkuara kanë dërguar një aeroplanmbajtëse të dytë në Mesdhe.

Ndërkohë, në lojë ka hyrë edhe Kina. Javën e ardhshme, i dërguari i Pekinit për Lindjen e Mesme, Zhai Jun do të vizitojë rajonin, ku do të kërkojë uljen e armëve dhe do të promovojë bisedimet e paqes.

Një ditë më parë ishte Rusia që bëri me dije se zëvendësministri i saj i Jashtëm shpreson të takohet me përfaqësuesit e Hamasit në shtetin e Gjirit të Katarit javën e ardhshme, për të diskutuar lirimin e pengjeve izraelitë.

LEXONI GJITHASHTU:

• “Mos e pushtoni”- Nga apeli i Biden, te “ferri” në Gaza, çfarë po ndodh në Izrael
• Biden: Gabim një pushtim izraelit i Gazës, duhet rrugë drejt shtetit palestinez