Diplomatët nderojnë viktimat, ambasadorët e SHBA-BE, lule pranë memorialit në Moskë

Diplomatë të huaj nga Shtetet e Bashkuara, vendet e BE-së, Afrikës dhe Amerikës Latine u bashkuan me mijëra qytetarë që vendosën buqeta me lule pranë memorialit të viktimave të masakrës në sallën e koncerteve “Krokus City Hall” në Moskë.

Të paktën 143 persona mbetën të vrarë dhe 551 të plagosur kur persona të armatosur hapën zjarr ndaj mijëra të pranishmëve dhe i vunë zjarrin godinës, më 22 mars, në atë që konsiderohet si sulmi më i rëndë në Rusi ndër vite.

Autoritetet ruse arrestuan 4 shtetas nga Taxhikistani ditën e sulmit. Kremlini deklaroi se ata po përpiqeshin të udhëtonin në Ukrainë kur ranë në pranga. Nga ana e tij, Kievi zyrtar ka mohuar çdo përgjegjësi duke i cilësuar pretendimet e Moskës “absurde”.

Një fraksion i grupit terrorist Shteti Islamik mori përsipër përgjegjësinë e sulmit përmes një deklarate të publikuar në agjencinë e lajmeve “AMAK”, por nuk dha prova për të mbështetur deklaratën.

Në total 9 të dyshuar janë paraqitur në gjykatë, disa prej të cilëve të dhunuar, dhe janë dërguar në burgim në pritje të gjykimit.

LEXONI GJITHASHTU:

• Sulmi terrorist në Moskë, emigrantët nga Taxhikistani po largohen nga Rusia
• Një histori e rrallë dashurie që mori fund në sulmin në Moskë