Diskutimet për projektligjin e buxhetit, Trump shprehet i zhgënjyer me Elon Musk

Nga Shtëpia e Bardhë, presidenti Donald Trump vazhdon bisedimet me kancelarin gjerman Merz, por nga ana tjetër, I pyetur nga gazetarët për qëndrimin kritik të miliarderit ndaj projektligjit të ri për taksat dhe shpenzimet, Trump u shpreh i habitur nga fjalët e Musk, i cili së fundmi e kishte quajtur projektligjin “të neveritshëm” në një postim në rrjetet sociale.

“Gjithmonë më ka pëlqyer Elon,” tha presidenti. “U habita kur pashë atë që kishte shkruar. Projektligji është i pabesueshëm – një ulje e madhe taksash. Do preferoja që të më kritikonte mua sesa ligjin vetë.”

Sipas Trump, kritikat e Musk vijnë pasi administrata vendosi të heqë mandatin për subvencionimin e automjeteve elektrike (EV). “Elon e dinte këtë që në fillim,” shtoi presidenti, “por unë e di që kjo e shqetësoi atë.”

Trump gjithashtu tregoi se Musk kishte rekomanduar një kandidat për drejtimin e NASA-s, por sipas tij, nuk e konsideroi të përshtatshëm emërimin. “Mund ta kuptoj pse është i mërzitur,” pranoi ai.

Duke reflektuar mbi marrëdhënien me shefin e Tesla-s dhe SpaceX, Trump shtoi: “Unë dhe Eloni kishim një marrëdhënie të shkëlqyer, nuk e di nëse do të kemi më. Por nuk është i vetmi që largohet nga administrata ime. Disa pastaj bëhen armiqësorë – kjo është ajo që unë e quaj ‘sindroma e çrregullimit të Trump’.”