Distancohet nga Moska, presidenti i ri i Argjentinës në mbështetje të Ukrainës

Presidenti i sapozgjedhur argjentinas është shprehur se dëshiron që të shkëpusë lidhjet e vendit të tij me Rusinë dhe sipas mediave të huaja, ai ka shprehur mbështetjen për Ukrainën.

Javier Milei, një anarko-kapitalist i vetë-përshkruar që është krahasuar me ish-presidentin amerikan Donald Trump, fitoi pothuajse 56% të votave në raundin e dytë të votimit në Argjentinë.

Gjatë fushatës zgjedhore, Milei tha se do të tërhiqej nga lidhjet me vende si Rusia, Kina dhe Brazili, për shkak të mosmarrëveshjeve me politikat e qeverive të tyre.

Nga ana tjetër, ai shprehu mbështetjen për Ukrainën në konfliktin e saj me Rusinë dhe ka thënë se i sheh SHBA-në dhe Izraelin si partnerët kryesorë të Argjentinës.

Duke e uruar zotin Milei për fitoren e tij, Volodymyr Zelenskyy shkroi: “Unë e vlerësoj qëndrimin e tij të qartë në mbështetje të Ukrainës”.

“Mezi pres të punojmë së bashku për të forcuar bashkëpunimin tonë dhe për të rivendosur rendin ndërkombëtar bazuar në të drejtën ndërkombëtare.”

Një zëdhënës i Kremlinit tha se ata i kishin ndjekur deklaratat e bëra nga presidenti argjentinas, por shtoi se “mbështet zhvillimin e marrëdhënieve dypalëshe” midis dy vendeve.

Argjentina ka pasur më parë lidhje të ngushta me Rusinë, pasi ka importuar vaksinën ruse Sputnik V kundër COVID-19.