“Djalli po përfiton nga pandemia”, mesazhi i Papa Françeskut në të Dielën e Palmës

Papa Françesku i nxiti të gjithë besimtarët e krishterë të rigjejnë forcën duke shtuar se “djalli po përfiton nga pandemia”.

Në Meshën e të Dielës së Palmës, e cila shënon nisjen e javës së Shenjtë Para Pashkëve nga sheshi Shën Pjetër Kreu i Vatikanit dha mesazhin e tij për të gjithë besimtarët ane mbanë botës.

“Ne po fillojmë Javën e Shenjtë, për herë të dytë gjatë një pandemie. Vitin e kaluar ne u shokuam. Këtë vit ne jemi më shumë nën presion dhe kriza ekonomike është bërë e rëndë. Në këtë situatë historike dhe shoqërore Zoti merr kryqin, Jezusi merr kryqin dhe merr përsipër të keqen që ka përfshirë këtë realitet, një e keqe fizike, psikologjike dhe mbi të gjitha shpirtërore. Djalli po përfiton nga kriza për të mbjellë mosbesim, dëshpërim dhe përçarje”, tha Papa Françesku.

Që kur u zgjodh në 2013, Papa Françesku e bëri të qartë se ai beson se djalli është i vërtetë, duke thënë në një dokument të vitit 2018 se ishte gabim ta konsideronte atë një mit.

Për shkak të pandemisë të pranishëm në meshën e së dielës ishim vetëm 120 besimtarë e të gjithë me maska e duke respektuar rregullat anti covid. Bazilika ishte e zbukuruar me disa degë ulliri e palma.

Klerikët dhe besimtarët katolikë u mblodhën edhe në Kishën e Varrit të Shenjtë në Jeruzalem për të festuar të Dielën e Palmës.

Patriarku i Jeruzalemit, u dha klerikëve dhe besimtarëve palma përpara se t’i dërgonte në një procesion që rrethonte edikulin, një faltore me kupolë e ndërtuar mbi vendin ku u vendos trupi i Jezuit pasi u hoq nga kryqi, pastaj u varros, dhe ku besohet se ai u ringjall nga vdekja. Pjesa e mbetur e shërbimeve të Javës së Shenjtët-E enjtja e Madhe, e Premtja e Madhe, e Shtuna e Madhe dhe Pashkët të Dielën e ardhshme, gjithashtu do të zhvillohen me një numër të kufizuar pjesëmarrësish.