“Do japim mbrojtje shumë të mirë”, Trump flet për garancitë e sigurisë për Ukrainën

Presidenti Donald Trump tha të enjten se ofrimi i garancive të sigurisë për Ukrainën është ende në diskutim midis SHBA-së dhe aleatëve të saj në NATO.

“Do ta diskutojmë sot, por do t’u japim atyre mbrojtje shumë të mirë, siguri shumë të mirë”, tha Trump.

Nga ana tjetër, Presidenti ukrainas Volodymyr Zelensky tha se vendit të tij i duhen “gjithçka” kur u pyet nga një gazetar se çfarë garancish sigurie i duhen për të arritur një marrëveshje.

Ai tha se Ukrainës së pari i duhet një ushtri e fortë, e cila përfshin armë, njerëz, trajnime dhe inteligjencë. Ai shtoi se e gjithë kjo do të varet nga “vendet e mëdha”, siç janë SHBA-të dhe aleatët e tjerë.

Këto kushte sigurie mund të përfaqësojnë një kompromis që synon mbrojtjen e Ukrainës pa lejuar që vendi të bashkohet me NATO-n – një hap që Rusia ka paralajmëruar prej kohësh se nuk do ta pranonte.

I dërguari special i Trump, Steve Witkoff, më parë i përshkroi garanci të tilla si “mbrojtje të ngjashme me Nenin 5” që do të ishin të ngjashme me atë që u jepet vendeve anëtare të NATO-s.

LEXONI GJITHASHTU:

• Armë amerikane për Ukrainën: Zelensky shpreh mirënjohje ndaj programit të NATO-s
• Trump vlerëson kostumin e zi të Zelensky-t pas debateve më herët për veshjen e tij