Donald Trump prezanton rrjetin e ri social TRUTH – kundër kujt po vepron ai?

Ish-presidenti amerikan, Donald Trump, ka lajmëruar se do të hedhë në treg një rrjet të ri social, i cili do të quhet TRUTH social.

Trump tha se platforma e tij e re do të ‘ngrinte krye mbi tiraninë e gjigandëve të teknologjisë’, duke i akuzuar ata se po përpiqen të heshtin çdo zë opozitar që tenton të flasë të vërtetën në SHBA.

Rrjetet sociale luajtën një rol kyç në hyrjen e ish-presidentit Trump në Shtëpinë e Bardhë, dhe ishte platforma e komunikimit më e preferuar prej tij gjatë periudhës kur drejtonte Shtetet e Bashkuara.

Por, z. Trump u dëbua nga Twitter dhe u pezullua nga Facebook, pasi mbështetësit e tij mësynë Kapitol Hill.

Këto rrjete sociale u vunë nën presion gjatë presidencës së Trump, pasi postimet e tij u kritikuan si fyese, nxitëse dhe me prirje ndaj ‘lajmeve të rreme’.

Rrjeti i ri i Trump do të përfshijë edhe një program video-on-demand, në të cilin do të shfaqen programe me pikëpamje që sipas Trump, nuk do të jenë ekskluzivisht të majta siç ndodh rëndomë sipas tij, në shumicën e mediave amerikane. “Ne jetojmë në një kohë që talebanët kanë një prezencë të jashtëzakonshme në Twitter, ndërsa Presidenti juaj i preferuar Amerikan kërkohet të heshtet,” – shkruan Trump.

“Të gjithë më pyesin, përse nuk del dikush që t’i bëjë rezistencë Gjigandëve të Teknologjisë? Epo ja, ne do të bëjmë këtë shumë shpejt!” – shtoi ai.

Vitin e shkuar, Twitter dhe Faceobook nisën të fshinin disa nga postimet e tij ose t’i etiketonin si ‘çorientuese’, si për shembull njërin prej tyre që thoshte se COVID ishte më pak vdekjeprurës se gripi i zakonshëm.

Ata vendosën ta dëbonin ose pezullonin z. Trump përfundimisht pas protestave të janarit.

LEXONI GJITHASHTU: