Dorëheqja e Tom Doshit, Celibashi: S’e kemi vlerësuar ende kërkesën, do veprohet sipas Kodit Zgjedhor

Komisioneri shtetëror i Zgjedhjeve, Ilirjan Celiabashi konfirmoi në një intervistë për Euronews Albania se në KQZ ka mbërritur një kërkesë nga kreu i PSD, Tom Doshi për t’u tërhequr nga kandidimi, por theksoi se nga ana e institucionit që ai drejton kjo kërkesë nuk është vlerësuar ende dhe vendimi do të merret në përputhe me kodin zgjedhor.

“Gjithçka do të bëhet sipas parashikimeve të Kodit Zgjedhor”, theksoi z. Celibashi teksa refuzoi të jepte të tjera komente lidhur me këtë çështje.

“Është një kërkesë që ka mbërritur në KQZ, nuk kemi për momentin asgjë gjykim dhe vlerësim lidhur me këtë çështje. Po vlerësojmë këtë kërkesë dhe do shprehemi. Për momentin nuk ka vend të bëhen komente. Në çdo rast, çdo deputet që tërhiqet nga mandati i tij zëvendësimi bëhet me kandidatin e radhës”, u shpreh z. Celibashi.

Kryekomisoneri u shpreh besimplotë se pavarësisht disa problematikave, në përgjithësi procesi i numërimit po shkon mirë dhe rezultati përfundimtar për subjektet që morën pjesë në zgjedhjet, do të dalë brenda 48 orëve, ashtu siç ishte thënë më herët nga Komisioni Qendror i Zgjedhjeve.