Drejtori i FBI-së, Wray thotë se do të japë dorëheqje para kthimit të Trumpit

Drejtori i Byrosë Federale amerikane të Hetimeve (FBI), Christopher Wray, ka thënë të mërkurën se do të japë dorëheqje para se presidenti i zgjedhur amerikan, Donald Trump, ta marrë detyrën muajin e ardhshëm.

Wray e bëri të ditur këtë gjatë një takimi të brendshëm të FBI-së të mërkurën.

Presidenti i zgjedhur Trump ka shfaqur dëshirën për ta zëvendësuar Wrayn me Kash Patelin.

Wray, i cili ishte nominuar nga Trumpi më 2017 për të shërbyer për një mandat 10-vjeçar, është përballur me kritika viteve të fundit nga republikanët, për shkak të hetimeve që FBI-ja i kreu ndaj Trumpit pasi ai u largua nga Shtëpia e Bardhë.

Duke dhënë dorëheqjen në vend se të presë shkarkimin, Wray po përpiqet ta shmangë ndonjë përplasje me administratën e re të Trumpit, e cila, sipas tij, do ta kishte përfshirë FBI-në “edhe më thellë në konflikt”.

“Qëllimi im është ta mbaj përqendrimin te misioni ynë — që është puna e domosdoshme që ju bëni çdo ditë në emër të popullit amerikan”, u tha Wray punonjësve të FBI-së.

“Mendoj se kjo është mënyra më e mirë për të shmangur zhytjen e byrosë më thellë në konflikt, duke forcuar vlerat dhe parimet që janë kaq të rëndësishme për mënyrën si e kryejmë punën tonë”, shtoi ai.

Trump e kishte bërë të qartë zemërimin e tij me Wrayn në disa raste.