Drejtori i OBSH-së lëshon kritika të ashpra për shpërndarjen e vaksinave anticovid

Drejtori i përgjithshëm i Organizatës Boterore të Shëndetësisë, Dr.Tedros, ka kritikuar ashpër shpërndarjen e vaksinave anticovid duke e quajtur ‘dështim katastrofik moral’.

Dr. Tedros ditën e sotme, ka shprehur shqetësimin e tij ndaj shpërndarjes së vaksinave anticovid në vendet e varfëra duke thënë se janë shpërndarë 39 milion doza vaksine anticovid, në 49 shtete me të ardhura të larta, ndërkohë një shteti me të ardhura më të ulëta, i janë dhënë vetëm 25 doza, duke mos përmendur për cilin shtet bëhet fjalë.

Ai u shpreh se qeveritë duhet t’i japin përparësi vaksinimit të punonjësve të shëndetësisë dhe njerëzve të moshuar duke thënë se:

“Nuk është e drejtë që të rriturit më të rinj në moshë, më të shëndetshëm në vendet e pasura të vaksinohen para punonjësve të shëndetësisë dhe njerëzve të moshuar në vendet e varfëra.”

Dr. Tedros tha se kompanitë farmaceutike u kanë dhënë përparësi vendeve të pasura.

Duhet kujtuar se programi COVAX, i cili u krijua nga OBSH për të ndihmuar në shpërndarjen e vaksinave në vendet e varfëra, ka siguruar dy miliardë doza të cilat do të shpërndahen në muajin shkurt.