Ish-anëtari i UÇK-së Dritan Goxhaj, i arrestuar në Tiranë me urdhër të Gjykatës Speciale u lënë në burg me vendim të Gjykatës 2 ditë më parë. Ai ka reaguar për herë të parë pas arrestimit rreth një muaj më parë përmes një letre të hapur të publikuar edhe në faqen e tij në Facebook.
Goxhaj shprehet se “sot, Shqipëria dhe sistemi i saj juridik po tentohen të merren peng nga ZPS-ja (Zyra e Prokurorit Special) e Kosovës dhe Gjykata Speciale e Kosovës.
“Këto dy subjekte, pasi kanë marrë peng shtetin e brishtë dhe të ri të Kosovës duke e kthyer atë në kohën e Rankoviçit, kur shqiptarët arrestoheshin, dënoheshin dhe vriteshin vetëm për lirinë e fjalës, vetëm se guxonin të shprehnin hapur opinionet e tyre të cilat, kur binin ndesh me politikën vrastare rankoviçiane të Serbisë në Kosovë, u rrezikonin jetën dhe qenësinë shqiptarëve, po mundohen edhe sot që, përveç shtetit të Kosovës dhe Kushtetutës së saj, të marrin peng edhe fjalën e lirë dhe ndërgjegjen në Kosovë nëpërmjet një grushti shteti juridik në Kosovë”, shkruan Goxhaj.
Sipas Goxhajt, veprat për të cilat kjo prokurori ka ngritur akuzë ndaj tij nuk janë absolutisht kompetencë e kësaj prokurorie dhe as e kësaj gjykate, “por këto dy subjekte i kanë dhënë vetes tagrin që të marrin edhe kompetencat e prokurorisë dhe gjykatës së juridiksionit të përgjithshëm”. Dhe kjo, shprehet më tej ai nuk është as më shumë e as më pak se një grusht shteti kriminal.
Goxhaj u arrestuar rreth një muaj më parë në Tiranë me akuzën se ka nxjerrë emrat e dëshmitarëve në disa çështje penale, të ngritura pas luftës në Kosovë.
LEXONI GJITHASHTU:
