Dronët dhe raketat ruse godasin Kievin përpara takimit Trump-Zelensky

Rusia sulmoi Kievin dhe pjesë të tjera të Ukrainës me qindra raketa dhe dronë të shtunën, përpara asaj që Presidenti Volodymyr Zelensky tha se do të ishte një takim vendimtar me Presidentin e SHBA-së Donald Trump për të arritur një marrëveshje dhe për t’i dhënë fund luftës katër vjeçare.

Zelensky e cilësoi sulmin gjatë natës, i cili tha se përfshinte rreth 500 dronë dhe 40 raketa dhe që ndërpreu energjinë elektrike dhe ngrohjen në disa pjesë të kryeqytetit, si përgjigjen e Rusisë ndaj përpjekjeve të vazhdueshme për paqe të ndërmjetësuara nga Uashingtoni.

Përpara sulmeve, udhëheqësi ukrainas tha se bisedimet e së dielës në Florida do të përqendrohen në territorin që do të kontrollohet nga secila palë pasi të mbaronin luftimet në konfliktin më “vdekjeprurës” të Evropës që nga Lufta e Dytë Botërore, i filluar nga Rusia në vitin 2022.

Sipas raportimeve nga mediat vendase, sulmi vazhdoi gjatë gjithë mëngjesit dhe një alarm ajror gati 10-orësh për kryeqytetin përfundoi vetëm në orën 11:20 sipas orës lokale.

Autoritetet thanë se një person u vra nga sulmi në rajonin e Kievit, ndërsa të paktën 19 persona u plagosën, përfshirë dy fëmijë.

“Nëse Rusia e shndërron edhe periudhën e Krishtlindjeve dhe të Vitit të Ri në një kohë shtëpish të shkatërruara dhe apartamentesh të djegura, të termocentraleve të rrënuara, atëherë këtij aktiviteti të sëmurë mund t’i përgjigjet vetëm me hapa vërtet të fortë”, shkroi Zelensky në X, duke i bërë thirrje SHBA-së dhe Evropës të ushtrojnë më shumë presion mbi Moskën.

Ai tha se ekipet e shpëtimit po kërkojnë ende një person të bllokuar nën rrënojat në njërën nga ndërtesat e banimit të dëmtuara.