Dy të vrarë dhe mijëra ndërtesa pa ngrohje pas sulmeve ruse në Ukrainë

Dy civilë u vranë dhe gati 2,600 pallate në Kiev mbetën pa ngrohje në mes të dimrit nga sulmet masive ruse gjatë natës në Ukrainë, thanë autoritetet ukrainase të premten.

Në qytetin lindor ukrainas të Lozovës, i cili u sulmua nga raketa dhe dronë rusë, një burrë dhe një grua u vranë në shtëpinë e tyre dhe gjashtë të tjerë u plagosën, tha zyrtari lokal Serhiy Zelensky.

Në Kiev, ku sulmet ruse gjatë natës shënjestruan përsëri infrastrukturën energjetike, “pothuajse 2,600 ndërtesa të tjera mbetën pa ngrohje” në shumë lagje, tha kryebashkiaku Vitali Klitschko, duke vënë në dukje se dy persona u plagosën në kryeqytetin ukrainas.

Ai vuri në dukje se më shumë se 1,100 pallate, nga një total prej 12,000 në Kiev, tashmë nuk kishin ngrohje pas sulmeve ruse në javët e fundit. Sulmet e fundit kanë lënë gjithashtu më shumë se 100,000 familje në kryeqytetin ukrainas pa energji elektrike, tha në një deklaratë kompania private e shërbimeve DTEK.

Rusia qëlloi në total 24 raketa dhe 219 dronë në Ukrainë gjatë natës, sipas Forcave Ajrore Ukrainase. Sulmet kryesisht synuan qytetet e Kievit, Kharkiv në Ukrainën verilindore, Dniepro në Ukrainën qendrore-lindore dhe Odessa në jug të vendit.

Në Dniepër, katër persona u plagosën, përfshirë dy fëmijë, dhe rreth 10,000 familje mbetën pa energji elektrike, sipas autoriteteve. Ndërkohë, Zëvendëskryeministri ukrainas Oleksiy Kuleba tha se pothuajse 300,000 njerëz në qytetin e Odesës janë pa ujë për shkak të ndërprerjeve të energjisë.

“Ky është një përpjekje e re për t’i privuar ukrainasit nga shërbimet bazë në mes të dimrit”, gjë që është veçanërisht e rëndë këtë vit, u ankua ai.

Sipas të dhënave zyrtare, infrastruktura energjetike është sulmuar më shumë se 220 herë që nga fillimi i pushtimit rus, duke përfshirë të paktën 10 sulme masive që nga tetori.