Dyshime për trajnim të agjentëve moldavë nga rusët në Bosnjë, nisin hetimet

Prokuroria e Bosnjë-Hercegovinës ka konfirmuar hapjen e një çështjeje që lidhet me kampet e dyshuara të trajnimit të luftëtarëve nga Rusia për qytetarë moldavë.

Vendimi për nisjen e hetimeve vjen pas raportimeve nga mediat në Bosnjë dhe Moldavi, ku disa agjentë të arrestuar kanë deklaruar se janë trajnuar nga rusët në territorin e Bosnjës.

Në tetor 2024, autoritetet në Moldavi arrestuan katër persona të cilët kishin marrë trajnim ushtarak dhe spiunazhi në Bosnjë dhe Serbi.

Të dyshuarit pretendohej se po planifikonin të sabotonin fushatën për referendumin mbi ndryshimet kushtetuese që synonin afrimin e Moldavisë me Bashkimin Evropian.

Në atë kohë, autoritetet moldave deklaruan se “është parandaluar një komplot për destabilizimin e Moldavisë.”

Më herët, ministri i Mbrojtjes së Bosnjës, Zukan Helez, deklaroi se ekzistonin kampe të tilla në zonat me shumicë serbe, por nuk paraqiti prova konkrete për aktivitetin e tyre.

Hetimet e Prokurorisë së Bosnjë-Hercegovinës pritet të hedhin më shumë dritë mbi rolin e mundshëm të shërbimeve sekrete ruse në territorin e Bosnjës dhe më gjerë në rajonin e Ballkanit.

LEXONI GJITHASHTU:

• Dodik shmang paraburgimin, paraqitjet vullnetarisht në Prokurorinë e Bosnjës
• Mbytet në plazhin e Durrësit turistja nga Bosnjë Hercegovina