Dyshime për vrasje të porositura nga burgu, thotë Ardian Çipa

Policia po heton lidhur me dyshimet se nga burgjet Elbasan, Peqin dhe Drenovë mund të jenë porositur ngjarje të rënda kriminale.

Këtë tha drejtori i policisë së Elbasanit, Ardian Çipa në emisionin ‘Sot’, i pyetur lidhur me operacionin policor të 2 ditëve më parë që çoi në arrestimin e mbi 20 personave përfshi zyrtarë dhe ish-zyrtarë të burgjeve.

“Kemi dyshime dhe pista hetimore që nga burgjet mund të jetë influencuar për kryerjen e ngjarjeve kriminale”, tha Çipa.

Ai sqaroi se hetimi i nisur për trafikim të lëndëve narkotike përfundoi në mbledhjen e provave që zbuluan veprimtarinë e jashtëligjshme në mjediset e burgjeve e më tej arrestimet e dy ditëve më parë.

Hetimi 6-mujor i policisë së Elbasanit zbuloi një sërë shkeljesh në burgjet Elbasan, Peqin dhe Drenovë përfshi futjen e lëndëve narkotike, pijeve alkoolike e ushtrimin e lojërave të fatit. Gjithashtu rezultoi se në një rast është shkelur siguria edhe në regjimin e posaçëm 41 bis.

Ndërkohë, në burgun e Peqinit ka rezultuar se një punonjëse seksi është futur duke u shtirur si familjare e një të dënuari.

LEXONI GJITHASHTU:

• 9 zyrtarë dhe ish-zyrtarë të burgjeve mbahen në qeli
• Sa kushton futja e drogës në qelitë e burgjeve?