“E vrau Putini”-Kremlini reagon pas akuzave të bashkëshortes së Navalnyt: Të pabaza!

Kremlini ka mohuar akuzat e gruas së Alexei Navalny se ai ishte helmuar nga agjenti nervor Novichok.

Sipas mediave të huaja, natën e kaluar, Yulia Navalnaya akuzoi autoritetet ruse për fshehjen e trupit të burrit të saj, ndërsa prisnin që “gjurmët e një tjetër noviçoku të Putinit të zhdukeshin”.

“Burri im nuk mund të thyhej. Dhe pikërisht për këtë e vrau Putini. I turpshëm, frikacak, që nuk guxonte ta shikonte në sy ose thjesht t’i thoshte emrin,” tha ajo.

Sot Kremlini e ka mohuar pretendimin dhe ka thënë se akuza “nuk bazohet në asgjë”.

Gjithashtu Kremlini zyrtar tha se Vladimir Putin nuk e pa videon e publikuar nga zonja Navalnaya.

Kujtojmë se Navalny ndërroi jetë dy ditë më parë, teksa ndodhej në burg ku po vuante një dënim prej 19-vitesh, me akuza të dyshimta, të cilat besohet se ishin të montuara politikisht nga presidenti i Rusisë Vladimir Putin.

Navalny ka qenë kritiku më i madh i Putinit në Rusi, i cili arriti të mblidhte rreth vetes mijëra mbështetës.

LEXONI GJITHASHTU:

• A do rrëzohet Vladimir Putini? Eksperti: Ç’do ndodhë në Rusi pas vdekjes së Navalnyt
• Putin promovon zëvendësshefin e burgjeve ruse, pak ditë pas vdekjes së Navalnyt