Edhe sa do të mbajë ekonomia? Flasin ekspertët: Qeveria duhet të kalojë tek paketa C, dedikuar totalisht biznesit

Ekonomia është ajo që po merr goditjen më të madhe për shkak të pandemisë COVID-19. Për të folur lidhur me sfidat e ekonomisë shqiptare në kushtet e kësaj krize dhe atë që pritet të ndodhë më pas, në Ilva Now diskutuan në një lidhje ‘live’ ekspertët e ekonomisë, Elton Haxhi dhe Adrian Civici.

Teksa e vlerësoi paketën e dytë disi më të balancuar se sa e para në ndihmën për biznesin dhe punonjësit, z. Haxhi theksoi se kjo paketë është disi e vonuar dhe duhet avancuar më përpara.

 “Biznesi kërkon siguri në këtë periudhë të vështirë. Kemi 66 mijë të papunë. Mirë do të ishte të sigurohej mbajtja në punë e këtyre njerëzve. Paketa totale shkon 2,7 për qind e GDP që nuk është e mjaftueshme”, tha z.Haxhi.

Ndërkohë z. Civici theksoi se kryeministri është duke ndjekur një radhë në paketat e ndihmës ekonomike, ku sipas tij ende mbetet prioritare çështja sociale.

“Në paken A ishin prioritet shtresat vulnerable. Paketa B sheh një hap më tej, garanton pagesën për ata që kanë humbur punën dhe i jep mundësi biznesit të pajiset me likuiditet. Kjo paketë është një hap përpara drejt biznesit. Edhe në vendet e tjera paketat e dyta ekuilibrojnë ato sociale. Nëse vazhdojmë në këtë ritëm, Shqipërisë do t’i duhet një paketë C për biznesin që të ketë likuiditet. Ndërsa nga korriku duhet plani D për ringritjen ekonomike”, tha z. Civici.

Lidhur me atë çfarë duhet të përmbajë paketa C, të dy ekspertët e ekonomisë ishin në një mendje në faktin se ajo duhet të përfshijë domosdoshërish lehtësira fiskale.

“Janë adresuar shtresat më në nevojë; të papunët , ata me ndihmë soiciale, në këtë paketë u fut edhe shtyrja e parapagimeve të tatim fitimit deri në fund të vitit që i jep një frymëmarrje edhe biznesit të madh, por ka ende mekanizma për ta mbështetur me paketën C. Të paktën 1/4 e tatim-fitimit duhet rishikuar, si edhe shuma që paguhet për tatim-fitim. Aktiviteti ka rënë tashmë ndaj duhet parë edhe impakti që do të ketë periudha në vazhim në rritjen e mëtejshme të papunëisë”, tha z. Haxhi.

Ndërkohë, sipas z. Civici, paketa C duhet të jetë e adresuar totalisht për biznesin, të cilit duhet t’i falen një pjesë e taksave dhe tatimeve.

“Çdo lloj shpejtësie, brenda rregullave higjienike, për të futur sa më shumë sektorë në punë, do të jetë e mirëpritur. Lehtësimet fiskale, pa abuzuar, një pjesë e biznesve duhet t’i nënstorhet injektimit të likuiditetit. Po t’i referohemi asaj që po bën Greqia, Serbia, Maqedonia, Kroacia, janë një hap përpara, tek paketa C”, tha z. Civici.