Edi Paloka i bindur për avantazhin e PD: Kjo është një fitore e madhe për Durrësin

Drejtuesi politik i Partisë Demokratike për qarkun e Durrësit, Edi Paloka, tha se numërimi i votave do të konfirmojë fitoren e selisë blu.

Me anë të një deklarate të bërë për mediat, numri dy i Partisë Demokratike shprehet se këto zgjedhje do t’i japin fitoren Durrësit dhe gjithë Shqipërisë.

“Sapo kemi përfunduar analizën e projeksioneve tona për qarkun e Durrësit dhe dua të them se kjo është një fitore e madhe për Durrësin. Është fitore e madhe për Shqipërinë. Është momenti të shohim nga e ardhmja, të projektojmë të ardhmen tonë”, tha ai.

Z. Paloka shprehet besimplotë se edhe procesi i numërimit të votave do vijojë normalisht dhe kjo fitore është çështje kohësh.

“Jam i binduri se edhe numërimi do të jetë i rregullt sipas të gjithë procedurave dhe në fund fare kjo fitore do të konfirmohet”, tha Paloka.

Partitë kryesore, PS-ja dhe PD-ja kanë shpejtuar të shpallin rezultatet pavarësisht faktit se nuk kishte filluar ende procesi i numërimit të fletëve të votimit.