Egjiptianët kanë nisur të hedhin votën për zgjedhjet presidenciale, në të cilat presidenti në detyrë Abdel Fatah el Sisi nuk ka një rival serioz dhe është thuajse e sigurt se do të fitojë një mandat tjetër, që do t’i mundësojë qëndrimin në pushtet deri në 2030-n.
Zgjedhjet janë eklipsuar nga konflikti Izrael-Hamas në Gaza. Vëmendja e thuajse të gjithë egjiptianëve është spostuar tek lufta në kufijtë lindorë të vendit dhe tek vuajtjet e civilëve palestinezë në enklavën bregdetare.
Por, procesi treditor i votimit po zhvillohet edhe në një kohë krize ekonomike që ka përfshirë Egjiptin. Bëhet fjalë për një vend ku rreth një e treta e 105 milionë banorëve jeton në varfëri.
Kriza rrjedh nga keqmenaxhimi i ekonomisë, por edhe nga pasojat e pandemisë së koronavirusit dhe vazhdimit të luftës në Ukrainë, që ka ngadalësuar ekonominë globale.
Ndaj El Sisit garojnë tre rivalë: Farid Zahran, kryetar i Partisë Social Demokrate në opozitë; Sanad Jamama, kryetar i partisë UAFD; dhe Hazem Omar, kryetar i Partisë Republikane.
Vetë El Sisi votoi të dielën në një qendër votimi në lagjen periferike Heliopolis të Kajros, sapo procesi nisi, në orën 9 të mëngjesit.
Një balotazh është planifikuar për më 8 dhe 10 janar, nëse asnjë nga kandidatët nuk siguron 50 % të votave.
LEXONI GJITHASHTU:
- Hamasi bën bilancin: Mbi 16 mijë palestinezë të vrarë nga forcat izraelite në Gaza
- Sky News: Veto e SHBA ndaj rezolutës së OKB për armëpushim ngjall zemërim në Gaza
