Egnatia dhe Vllaznia përballen në “Final 4”, shkodranët gati për “hakmarrje”

2 nga ekipet më të mira të kampionatit që sapo u mbyll në futbollin shqiptar përballen me njëra-tjetrën, me vetëm njërën prej tyre që ka shancin të kalojë në finalen e “Final 4”. Pas Partizanit është radha e Egnatias dhe Vllaznisë, për të zgjedhur fituesin mes tyre, ndërsa gjysmëfinalja e dytë luhet në “Air Albania” të dielën në orën 20:00.

Shkodra është mobilizuar e gjitha, me mënyra të ndryshme për të motivuar lojtarët, duke e kërkuar me ngulm fitimin e titullit kampion, që mungon prej më tepër se 2 dekadash.

Përgatitjet e skuadrës janë drejt fundit, ndërsa trajneri Thomas Brdariç ka analizuar gjendjen.

“Atmosfera është shumë e mirë, kemi përpara një ndeshje të madhe. Të gjithë duhet ta kalojnë këtë sfidë, të punojmë për të gjetur avantazhin sa më shpejt. Për këdo prej lojtarëve është dicka speciale dhe ne jemi shumë të motivuar”, tha Brdariç.

Idetë e teknikut janë të qarta.

“Ne do të përballemi në mënyrën më të mirë, me shumë ide, detyrat janë në proces, kemi luajtur ndaj tyre edhe në situata të tjera. Është ndeshje e hapur dhe të dyja skuadrat do të luftojnë për të kaluar në finale”, tha ai.

Në lidhje me këtë përballje, në qytetin e Shkodrës janë shitur më tepër se 7 mijë bileta, ku mbështetja të dielën pritet të jetë e madhe.