Elbasani fiton 1-0 ndaj Flamurtarit në Vlorë, tension në tribuna

Flamurtari ka pësuar një tjetër humbje në kampionatin shqiptar, këtë herë nga Elbasani me rezultatin 0-1 në qytetin e Vlorës.

Fituesi u vendos nga një gol i Xhonatan Lajthisë në fraksionin e dytë, që i dha tre pikët ekipit të trajnerit Ivan Gvozdenovic dhe i ngriti ata në krye të klasifikimit, ndërsa vlonjatët mbeten në vendin e fundit.

Ndeshja u karakterizua nga një lojë e luftuar dhe me raste të pakta shënimi, ku Flamurtari krijoi mundësi, por nuk arriti t’i konkretizojë ato.

Në përfundim të sfidës, trajneri i Flamurtarit, Francesco Moriero, deklaroi:

“Mendoj se sot djemtë kanë bërë paraqitjen më të mirë që kur unë kam ardhur. Nuk e merituam humbjen, pasi ekipi tregoi karakter dhe vendosi zemrën në fushë.”

Ndërsa trajneri i Elbasanit, Ivan Gvozdenovic, tha:

“Ishim përgatitur për një ndeshje shumë të vështirë. E dija si lojtar dhe trajner që në Vlorë çdo ndeshje është e fortë.”

Pas përfundimit të lojës, situata në tribunat e stadiumit u tensionua. Tifozët e Flamurtarit u përfshinë në konflikte mes tyre, ndërsa u desh ndërhyrja e forcave të shumta policore për të rikthyer qetësinë. Disa tifozë kuqezi u shoqëruan jashtë ambienteve të stadiumit, ndërsa tifozët e miqve thyen stolat e stadiumit të saporikonstruktuar. Për këtë pritet një vendim i disiplinës në ditët në vijim.