Elon Musk kritikon projektligjin e Trump për uljen e shpenzimeve qeveritare

Sipërmarrësi miliarder amerikan, Elon Musk, ka shprehur kritika të ashpra ndaj projektligjit të propozuar nga Presidenti i SHBA-së, Donald Trump, për uljen e shpenzimeve qeveritare, duke e akuzuar atë për promovimin e interesave të tij politike dhe të biznesit.

Raporti i portalit Axios, duke cituar burime të njohura, thekson se Musk ishte i shqetësuar nga disa vendime të qeverisë Trump, që ai i konsideron si të dëmshme për bizneset e tij.

Sipas burimeve, Musk ishte i frustruar nga fakti që detyrat e tij si kreu i Departamentit të Efikasitetit të Qeverisë (DOGE) nuk u rinovuan, ndërkohë që gjithashtu shprehu zemërim për vendimin e Trump për të tërhequr emërimin e Jared Isaacman, një aleat i Musk, si administrator i NASA-s.

Kritikat e Musk u fokusuan gjithashtu në dështimet e projektligjit që, sipas tij, dëmtonin interesat e biznesit të tij. Një nga pikat kryesore të kritikës ishte se projektligji parashikon një ulje të kredive tatimore për automjetet elektrike, një masë që mund të dëmtonte prodhuesit e makinave si Tesla, kompania e Musk. Ai gjithashtu ishte i zhgënjyer nga mosrealizimi i mundësisë që Administrata Federale e Aviacionit të përdorte sistemin e tij satelitor, Starlink, për menaxhimin e trafikut ajror kombëtar.

Në një postim të fundit në X  Musk e kritikoi projektligjin duke e quajtur atë një “gjë të neveritshme”, duke theksuar se ai do të kontribuonte në rritjen e deficitit buxhetor tashmë të madh të Shteteve të Bashkuara. Ky nuk është hera e parë që Musk shpreh pakënaqësinë e tij ndaj këtij projektligji, pasi ai ka shprehur të njëjtën kritike më 28 maj.

Ky qëndrim i Musk ka nxitur diskutime të gjera mbi ndikimin e politikave qeveritare në zhvillimin e industrive të reja teknologjike dhe energjitike, si dhe mbi marrëdhëniet ndërmjet sipërmarrësve të fuqishëm dhe administratës Trump.

LEXONI GJITHASHTU:

• Trump nënshkruan urdhër për dyfishimin e tarifave të çelikut dhe aluminit
• Mbyllen përkohësisht qendrat e ndihmës në Gaza, Izraeli i shpall “zona luftimi”