Elon Musk u largua nga adiministrata Trump, reagon Presidenti i SHBA-së

Presidenti i Shteteve të Bashkuara, Donald Trump, ka vlerësuar publikisht miliarderin Elon Musk, duke e quajtur “fantastik”, ndërsa njoftoi mbajtjen e një konference për shtyp me të, të premten në Zyrën Ovale të Shtëpisë së Bardhë.

Në një postim në rrjetin e tij social Truth Social, Trump deklaroi:

“Kjo do të jetë dita e tij e fundit në administratë, por jo realisht, sepse ai do të jetë gjithmonë me ne, duke na ndihmuar gjatë gjithë kohës. Elon është fantastik!”

Musk ka shërbyer në administratën Trump si drejtues i Departamentit të Efikasitetit të Qeverisë, një njësi e krijuar me qëllim shkurtimin e shpenzimeve federale dhe përmirësimin e funksionimit të aparatit shtetëror.

Njoftimi për largimin e Musk nga pozicioni qeveritar u bë të mërkurën, duke sjellë njëfarë lehtësimi te investitorët e Tesla-s, pas një rënie të ndjeshme të aksioneve të kompanisë këtë vit. Kjo rënie është lidhur pjesërisht me reagimet negative ndaj mbështetjes së vazhdueshme të Musk për Trump dhe për partitë e djathta në Evropë.

Musk, i cili njihet për qëndrimet e tij të hapura dhe shpeshherë kontroverse, ka kritikuar së fundmi legjislacionin e propozuar nga republikanët mbi taksat dhe buxhetin, duke e cilësuar si të papërballueshëm dhe joefikas. Po ashtu, ai ka njoftuar se do të shpenzojë më pak për fushatat politike në të ardhmen, pas një kontributi prej afro 300 milionë dollarësh në vitin e kaluar për kandidaturën presidenciale të Trump dhe për kandidatë të tjerë republikanë.

Konferenca për shtyp e së premtes pritet të shërbejë si një reflektim mbi kontributin e Musk në administratë, por gjithashtu edhe si sinjal i vazhdimit të marrëdhënieve të tij të ngushta me Presidentin Trump.

LEXONI GJITHASHTU:

• Elon Musk largohet nga administrata Trump, por Doge do të vazhdojë
• Rënia e të ardhurave të Tesla, Elon Musk do të reduktojë angazhimin politik