EMRI/ Morën çelësat e makinës pa leje dhe u aksidentuan, 16-vjeçari shqiptar humb jetën në Greqi

Pasditen e së premtes, një aksident automobilistik në rrugën “Dhimokratias”, në zonën Luca të periferisë së Athinë, la të vdekur një adoleshent shqiptar dhe dy të tjerë të plagosur rëndë. Viktima është 16-vjeçari Eljon Metaj.

Sipas informacioneve paraprake, njëri prej adoleshentëve kishte marrë çelësat e automjetit të nënës së tij dhe u nis për një xhiro së bashku me dy shokët. Në rrethana ende të paqarta, automjeti doli nga rruga dhe u përplas me një pemë. Si pasojë, Eljon Metaj humbi jetën në vend, ndërsa drejtuesi dhe një tjetër i mitur u transportuan me urgjencë në spital. Burimet thonë se të plagosurit ndodhen jashtë rrezikut për jetën.

Policia greke ka ndaluar drejtuesin e automjetit dhe prindërit e tij, ndërsa trupi i viktimës është dërguar në morg. Hetimet për zbardhjen e plotë të rrethanave vijojnë nga policia rrugore e Drejtorisë së Policisë së Athinës.

Ngjarja ngre shqetësime mbi sigurinë e adoleshentëve dhe përdorimin e automjeteve, duke theksuar nevojën për mbikëqyrje dhe edukim më të madh për të miturit.

Një dëshmitar nga zona rrëfeu: “Ambulancat erdhën menjëherë. Njëri nga fëmijët doli nga makina. Dëgjuam një zhurmë të fortë, por nuk e kuptuam çfarë kishte ndodhur.”