Enver ​Hoxhaj: PDK s’ka votë për Osmanin presidente, është figurë përçarëse

Ushtruesi i detyrës së kryetarit të PDK-së, Enver Hoxhaj ka përsëritur serish qëndrimin e kësaj partie rreth kandidaturës së Vjosa Osmanit për presidente të ardhshme të Kosovës.

Ai ka thënë se Partia Demokratike e Kosovës nuk ka votë për Vjosa Osmanin për presidente pasi sipas Hoxhajt ajo e ka dëshmuar veten si figurë “përçarëse që nuk e përfaqëson unitetin e popullit”.

“Duke qenë e motivuar partiakisht dhe që përfaqëson interesat e vetëm një partie dhe liderit të saj, Osmani nuk mund të jetë aspak e denjë për pozitën e presidentes. PDK-ja nuk do ta tradhtojë besimin e votuesve të saj. Ne jemi partia e vetme në opozitë që do ta ballafaqojmë deri në fund pushtetin e ri, do t’i përfaqësojmë qytetarët e Kosovës dhe do ta mbajmë përgjegjëse për çdo premtim e vendim”, shkruan ai.

Ai thotë se Partia Demokratike do vazhdojë të jetë kundër politikave të kryeministrit aktual të Kosovës.

“PDK sikurse e kemi thënë gjatë zgjedhjeve, do të jetë fronti i vetëm politik në Kosovë kundër boshtit populist të përfaqësuar nga (Albin) Kurti”, shkruan ai.