Erdogan: Forcat turke kanë vrarë “liderin” e grupit të Shtetit Islamik

Forcat turke e kanë vrarë liderin e supozuar të grupit të Shtetit Islamik (IS) gjatë një operacioni në Siri, tha mbrëmjen e së dielës, më 30 prill, presidenti i Turqisë, Recep Tayyip Erdogan.

Presidenti Erdogan tha gjatë një intervistë për televizionin turk TRT se lideri i IS-it, i njohur si Abu Hussein al-Qurayshi, u vra në një sulm të kryer të shtunën, më 29 prill.

Erdogan tha se agjencia turke e inteligjencës, MIT, kishte qenë duke e ndjekur atë “për një kohë të gjatë”.

“Ne do ta vazhdojmë luftën tonë kundër organizatave terroriste pa diskriminuar asnjërën prej tyre”, tha Erdogan gjatë intervistës.

Turqia ka kryer operacione të shumta kundër IS-it dhe grupeve kurde përgjatë kufirit sirian, duke kapur ose vrarë militantë të dyshuar. Turqia kontrollon pjesë të mëdha të territorit në Sirinë veriore pas një serie inkursionesh tokësore për t’i larguar grupet kurde nga kufiri turko-sirian.

Abu Hussein al-Qurayshi u emërua udhëheqës i grupit militant pasi kreu i tij i mëparshëm u vra në tetor. Një zëdhënës i IS-it e quajti atë “një nga luftëtarët veteranë dhe një nga djemtë besnikë të Shtetit Islamik”.

Ai mori drejtimin e IS-it në kohën kur grupi ekstremist ka humbur kontrollin e territorit që dikur mbante në Irak dhe Siri. Megjithatë, grupi ishte përpjekur të aktivizohej sërish, duke kryer disa sulme vdekjeprurëse në të dyja vendet.

LEXONI GJITHASHTU:

• “Mos bëni pazare me mjekun”, Kirurgu: Ja ndërhyrja më e shtrenjtë kirugjikale
• I veshur si gorrilla në rrugë! Polici anglez: Jam krenar se ashtu u bëra i famshëm