Erdogan kritikon Izraelin për minimin e stabilitetit në Siri

Presidenti turk, Rexhep Tajip Erdogan, ka kritikuar ashpër Izraelin për rolin e tij në minimin e stabilitetit në Sirinë fqinje, gjatë një forumi diplomatik në Antalia, disa ditë pasi Turqia dhe Izraeli zhvilluan bisedime për të zbutur tensionet mes tyre.

“Turqia nuk do të lejojë që Siria të tërhiqet në një vorbull të re paqëndrueshmërie,” tha Erdogan, duke e akuzuar Izraelin për përpjekje për të minuar “revolucionin e 8 dhjetorit”, i cili çoi në rrëzimin e ish-presidentit sirian Bashar al-Assad.

Kreu i shtetit turk theksoi se Turqia është e angazhuar në një dialog të ngushtë dhe mirëkuptim të përbashkët me aktorët kryesorë të rajonit, përfshirë presidentët Donald Trump dhe Vladimir Putin, në lidhje me ruajtjen e integritetit territorial dhe stabilitetit të Sirisë.

Pjesëmarrës në forum ishin edhe ministri i Jashtëm rus, Sergei Lavrov, dhe presidenti sirian Ahmed al-Sharaa, i cili u takua me Erdogan në margjinat e ngjarjes. Në këtë takim, Erdogan përsëriti përpjekjet e Turqisë për të hequr sanksionet ndaj Sirisë dhe shprehu mbështetje për qëllimin e këtij vendi për të shmangur një kaos të ri.

Tensionet midis Izraelit dhe Turqisë janë rritur ndjeshëm që nga përmbysja e Assad, duke arritur kulmin kur forcat izraelite sulmuan disa baza ushtarake në Siri me sulme ajrore në fillim të këtij muaji.

LEXONI GJITHASHTU:

• Franca ashpërson masat për ndalimin e telefonave në shkollat e mesme
• Sulmi ajror izraelit shkatërroi objektet kryesore mjekësore, çfarë thanë dëshmitarët