Erdogan: Turqia mbështet betejën e Ukrainës për integritet territorial

Turqia mbështet betejën e Ukrainës për integritet territorial dhe e sheh sulmin e Rusisë si “një goditje e fortë” ndaj paqes dhe stabilitetit rajonal, deklaroi të enjten presidenti Recep Tayyip Erdogan.

Erdogan bëri thirrje për të gjetur zgjidhje përmes dialogut.

“Ky hap, të cilin ne e shohim si një akt kundër ligjeve ndërkombëtare, është një goditje e fortë ndaj paqes, harmonisë dhe stabilitetit rajonal”, tha ai, teksa shtoi se ka përçuar një mesazh presidentit ukrainas Volodymyr Zelenskiy ku i përcjell mbështetjen e Ankarasë.

Ai thotë se Turqia, e cila ndan kufij detar si me Ukrainën ashtu dhe me Rusinë në Detin e Zi, i konsideron të dy këto shtete si vende mike por shtoi se është “sinqerisht i keq ardhur” që Moska dhe Kievi përshkallëzuan në këtë konflikt.

Edhe pse ka një marrëdhënie të ngushtë bashkëpunimi me Rusinë në fushën e sigurisë dhe energjitikës, Ankaraja i ka shitur Ukrainës dronë dhe ka një marrëveshje për të vazhduar furnizimin me to, lëvizje e cila ka zemëruar Moskën.

Turqia kundërshton politikat ruse në Siri dhe Libi, aneksimin e Krimesë në 2014 si dhe njohjen e dy rajoneve të Gjeorgjisë në 2008.

Më herët gjatë këtij muaji, gjashtë anije luftarake ruse dhe një nëndetëse kaluan në ngushticat e Dardaneleve dhe të Bosforit në Detin e Zi. Asokohe, Moska i quajti stërvitje detare pranë ujërave të Ukrainës.

LEXONI GJITHASHTU:

• Amerikanët kundër përfshirjes së SHBA-ve në konfliktit Rusi-Ukrainë
• Gazetarët ukrainas postojnë video të sulmeve ajrore ruse
• Ambasadori ukrainas në Tiranë: Dhjetëra viktima në Ukrainë, mes tyre fëmijë