Euronews Albania siguron pamjet e tentativës së arratisjes nga burgu të Arbër Çekajt dhe Fatmir Pjetrit

Euronews Albania ka siguruar pamjet e tentativës së arratisjes nga burgu të Arbër Çekajt dhe Fatmir Pjetrit më 8 gusht të këtij viti.

Arbër Çekaj shfaqet në videon e mësipërme duke zbritur me shpejtësi shkallët e godinës.

Ndërsa Pjetri shfaqet në videon e dytë, teksa hidhet nga një lartësi brenda ambienteve të burgut “313” në kryeqytet duke përdor një litar të improvizuar.

Por, këto momente ai përballet me 2 policë, të cilët ndodheshin në mjediset e administratës së burgut.

Të dy të burgosurit u ndihmuan nga Lulëzim Çepele, i cili preu venat e dorës për të tërhequr vëmendjen. Për këtë ngjarje janë marrë në hetim 8 gardianë të burgut.

Arbër Çekaj u arrestua në vitin 2018 si organizator i trafikimit me import bananesh të 613 kg kokainë nga Ekuadori. Ai u dënua me 14 vite burg. Dënimi iu la në fuqi edhe nga Apeli në qershor të këtij viti.

Nga ana tjetër, Fatmir Pjetri është dënuar me 30 vite burg nga Gjykata e Shkallës së Parë për pjesëmarrje në të ashtuquajturën “Banda e babagjyshërve”.

Kjo bandë është akuzuar për dhjetëra grabitje të dhunshme me armë në Shqipëri dhe jashtë vendit gjatë viteve 2013-2014.

Anëtarët u kapën dhe dënuan deri në vitin 2016, me përjashtim të Pjetrit. Ky u ndalua në Holandë dhe u ekstradua në vitin 2019. Çështja e tij ka qenë në Apel deri në qershorin e këtij viti.

LEXONI GJITHASHTU:

• Arbër Çekaj mohon planin e arratisjes nga burgu: Ishte ide e Fatmir Pjetrit
• Kapen teksa po arratiseshin nga burgu Arbër Çekaj dhe Fatmir Pjetri
• 8 gardianë nën hetim për planin e arratisjes së të burgosurve Çekaj, Pjetri e Çepele