FBI e përfshirë në sulmin e 6 janarit? Nis hetimi nga inteligjenca amerikane

Komuniteti i inteligjencës në Shtetet e Bashkuara ka hapur një hetim të brendshëm për të përcaktuar nëse Byroja Federale e Hetimit ka pasur një rol të mundshëm në planifikimin e sulmit ndaj Kapitolit më 6 janar 2021. Lajmi u bë publik gjatë një seance dëgjimore në Senat, ku po shqyrtohej emërimi i Joseph Kent si drejtor i Qendrës Kombëtare për Kundër-Terrorizëm.

“Ne aktualisht jemi duke hetuar”, deklaroi Kent, pa dhënë detaje se cila nga 18 agjencitë e inteligjencës amerikane po drejton procesin. Deklarata e tij erdhi si përgjigje ndaj një pyetjeje nga senatori demokrat Mark Kelly, i cili rikujtoi përpjekjet e mbështetësve të Donald Trump për të ndalur certifikimin e fitores së Joe Biden më 6 janar 2021.

Emri i Kentit ka tërhequr vëmendje edhe për shkak të qëndrimeve të tij të mëhershme publike, ku ka sugjeruar në rrjetet sociale se sulmi në Kapitol mund të ketë qenë një “operacion inteligjence”, duke implikuar përfshirjen e FBI-së dhe agjencive të tjera.

Një raport i pavarur i Departamentit të Drejtësisë, i publikuar në dhjetor, kishte hedhur poshtë pretendimet e ekstremit të djathtë mbi përfshirjen e fshehtë të FBI-së në sulm. Sipas raportit, 26 informatorë të FBI-së ishin fizikisht në Uashington atë ditë, por asnjëri prej tyre nuk kishte autorizim për të hyrë në ndërtesën e Kapitolit ose për të marrë pjesë në dhunë.

Gjithashtu, drejtuesja e re e komunitetit të inteligjencës amerikane, Tulsi Gabbard, mbikëqyr tani edhe funksionet e inteligjencës brenda FBI-së, gjë që mund të ndikojë në drejtimin dhe transparencën e hetimit.

LEXONI GJITHASHTU:

• Pas pezullimit të tarifave nga Trump, edhe BE heq kundërmasat ndaj SHBA
• Trump pezullon me 90 ditë tarifat e reja, përveç Kinës, të cilës i rriten në 125%
• Efektet e tarifave të Trump dhe lufta tregtare, bie besimi në ekonminë amerikane