Fermerët grekë paralajmërojnë përshkallëzim të bllokadave, takim kombëtar më 4 janar

Ndërsa vijojnë bllokadën e tyre, fermerët grekë kanë njoftuar se takimi kombëtar i blloqeve do të zhvillohet të dielën, më 4 janar, në orën 12:00 në Malgara, për të diskutuar përshkallëzimin e mobilizimeve dhe hapat e mëtejshëm të tyre.

“Duke pasur shumicën e popullit grek në anën tonë, kemi sprapsur çdo përpjekje të qeverisë për të minuar luftën tonë të drejtë. As represioni, as thirrjet për dialoge të rreme, as shpifjet dhe presionet, nuk mund të na thyejnë. Çfarë arrijnë këto është vetëm të rrisin vendosmërinë dhe zemërimin tonë kundër kokëfortësisë së qeverisë. I bëjmë thirrje të gjitha blloqeve, sipas vendimeve të Asambleve të tyre të Përgjithshme, të marrin pjesë në takimin kombëtar për të diskutuar për përshkallëzimin e protestave dhe lëvizjet e mëtejshme. E themi qartë: nuk do të tërhiqemi, nuk do të largohemi me kokën ulur, nuk kemi frikë dhe nuk do të shitemi. Do të fitojmë, sepse kjo është një luftë për mbijetesë”, thuhet në njoftimin e Komitetit të blloqeve.

Lehtësim për lëvizjen e pushuesve të Vitit të Ri

Pavarësisht thirrjes së kryeministrit për “dialog të sinqertë”, fermerët mbeten të palëkundur në vendosmërinë e tyre për të vazhduar mobilizimet pas festave të fundvitit. Megjithatë, ata kanë vendosur të lehtësojnë bllokadat për të mundësuar lëvizjen e pushuesve, duke vendosur traktorët vetëm në pikat kyçe dhe rrugët kombëtare.