Festa e Trëndafilave në fshatin Pojan të Maliqit ka dhënë gjallëri e gëzim për banorët e fshatit dhe vizitorët që kishin ardhur posaçërisht për këtë festë.

Shumica e oborreve të shtëpive në këtë fshat janë  të zbukuruar nga trëndafilat shumëngjyrëshe. Filloreta na mirëpriti në shtëpinë e saj, për të na treguar se kjo është një traditë e hershme e kësaj zone, e se ajo përkujdeset për këto lule si të ishin fëmijët e saj.

“Në Pojan filloi të bëhet një traditë shumë e madhe dhe po shtohet, po zbukurohen gjithë kopshtet e Pojanit me lulishte të vogla apo të mëdha, rëndësi ka që trëndafili po kultivohet.  Unë jam  marrë gjithmonë me fëmijë, kam qenë mami, dhe me këta trëndafila me duken tamam si fëmijët e mi, flas, ju buzëqesh, ju bëj yzmet, i prashit, i vadit, të gjitha gjërat ja bej”, u shpreh Filloreta Zaçe, banore nga Pojani.

Gratë e tjera që kanë dalë në panair, tregojnë se trëndafili është i pranishëm në secila shtëpi e këtij fshati.

“Sepse fshati jonë e feston çdo vit këtë festë dhe ne çdo oborr të Pojanit ka trëndafila që i zbukurojnë me erë e bukuri. Jo, është shtuar tradita. Edhe fëmijët kanë qejf të mbjellin”, tha një banore.

“Këto llokume janë të prodhuara brez pas brezi me petalet e trëndafilit dhe besoj do vazhdojë. Llokumet reçelin, konjakun”, u shpreh një tjetër.

Kryetari i Bashkisë Maliq, Gëzim Topçiu, kërkon që kjo traditë e bukur mos ndalojë por të shtohet në çdo territor të kësaj bashkie.

“Bashkia e Maliqit është bërë pjesë e kësaj nisme, duke shtuar mbjelljen e trëndafilave nëpër shtëpi e mjedis publik. Të shpresojmë se do vazhdojë vit pas viti, ky është edicioni i dytë i ndaluar një vit me pare nga pandemi, besojmë do vazhdojë si festë, jo vetëm i trëndafilit, por ne fund te fundit dhe si risi të shpresojmë se do shkoje e ne zona te tjera te Maliqit”, tha Topçiu.

LEXONI GJITHASHTU

• “Konaku i Rrajcës” aktiviteti që ruan trashëgiminë folklorike të zonës
• Çiftelinë tani e duan më pak, veglat muzikore folklorike shqiptare s’kërkohen më si dikur