Festivali i filmit në Dropull, emocione dhe garë mes pjesëmarrësve

E njohim të gjithë si “xhaxhi piktori”, por këtë herë Kosta Zhonga do të sjellë për publikun festivalin e parë ndërkombëtar të filmit të shkurtër në Dropull.

Festivali do të zhvillohet në vendin e tij origjinës, për t’i sjellë pak gjallëri përmes filmave që do shfaqen në datat 24, 25 dhe 26 gusht.

“Nuk ka asgjë, nuk bëhet asnjë lloj aktiviteti aty përveç panaireve të zonave që i organizojnë fshatarët aty, mendova pse mos e bëjmë diçka të tillë. Janë tema të përgjithshme që ndodhin çdo ditë në familje dhe këtu është mbështetur edhe ky festival”, tha Kosta Zhonga, drejtor i festivalit.

Pjesë e konkursit do të jenë 20 filma të realizuar në vitet 2019-2020. Mes tyre katër janë realizuar nga regjisorë shqiptarë dhe 16 nga regjisorë grekë.

“Gjithashtu kemi edhe 15 filma të tjerë, që do shfaqen jashtë konkurrimit, janë regjisorë të Ballkanit. Nga Shqipëria është një vajzë, kemi nga Greqia, Serbia, Kroacia, Rumania, Turqia, pra nga i gjithë Ballkani,” – u shpreh Zhonga. 

Për tre ditë, festivali që ka si media partner televizionin Euronews Albania do të sjellë për qytetarët jo vetëm filma, por edhe koncerte, punime me plastelinë nga fëmijët e zonës prej të cilave do realizohet një film i animuar nga regjisori Joan Zhonga si dhe një ekspozitë nga piktori Jorgo Mici.

E sigurisht nuk ka sesi të mungojë edhe një ditë e dedikuar për fëmijët nga vetë “xhaxhi piktori”.

“Se ma kërkuan fëmijët, thanë ‘xhaxhi piktori po ne nuk do na bësh gjë, nuk do na pikturosh?’ Do bëjmë një ekspozitë me punët që do realizojmë,” – u shpreh piktori Kosta Zhonga

Në fund të festivalit filmat fitues do të kurorëzohen me çmimin e Adrianopulit, teatrit të ndodhur në Bashkinë e Dropullit, Gjirokastër.

LEXONI GJITHASHTU: 

• Tenori Ramë Lahaj humb nënën dy orë para shfaqjes dhe detyrohet të ndërpresë programin
• Xhaz dhe rock në Shkodër, të rinjtë e Ballkanit thyejnë tabutë e kufijve me muzikë
• Arkitekti 77-vjeçar kthen në jetë ndërtesat e vjetra