Festivali Rajonal në Gjirokastër, nxënësit prezantojnë ide në teknologji, mjedis dhe sipërmarrje

Në Gjirokastër është çelur Festivali Rajonal i Kompanive të Nxënësve, me pjesëmarrje të gjerë nga e gjithë vendi. Në këtë aktivitet, 240 nxënës gjimnazistë nga 40 shkolla prezantuan ide inovative në sipërmarrje, teknologji dhe mjedis.

Festivali u krijoi mundësinë të rinjve pjesëmarrës të promovonin talentin e tyre në fusha të ndryshme, si teknologjia, mbrojtja e mjedisit dhe mbështetja sociale, përmes projekteve konkrete dhe ideve për zhvillim biznesi.

“Ne kemi organizuar një website ku kemi vendosur të bëjmë evente për adoleshentët si për orientimin e karrierës së tyre ashtu edhe evente argëtuese me njëri-tjetrin”, thotë një nga pjesëmarrëset.

“Ideja jonë është një aplikacion që synon të ndihmojë personat me vështirësi në shikim duke u bërë atyre përshkrimin e filmave ose aplikacioneve të ndryshme me zë në gjuhën shqipe. Gjithashtu ne e mundësojmë me një asistent IA, i cili i ndihmon për të përshkruar dhe për të dhënë sa më shumë detaje”, thotë një nga djemtë pjesëmarrës.

Vajza me syza: “Produkti ynë është një pajisje që monitoron dioksidin e karbonit në ambiente të mbyllura. Nëse rritet niveli i dioksidit të karbonit, ju vjen menjëherë sinjalizimi në telefon dhe më pas ambienti pastrohet”, thotë një vajzë tjetër pjesëmarrëse.

“Provimi i tyre janë produktet e sotme, provimi i tyre janë raportet që ndërtojnë njësoj si një kompani e vërtetë dhe kjo i shërben shumë, sepse ata bëjnë praktikë me atë që ne i kërkojmë kur i marrim në punë, përvojën e punës. Një i ri të fillojë të ndjejë përgjegjësinë e biznesit, të mësojë hapat e biznesit dhe të dështojë sa më herët në shkollë të mesme, aq më i aftë është për botën e punës”, thotë Blerina Guga, Organizatore e Festivalit.

Përgjatë këtij viti, në Gjirokastër janë zhvilluar aktivitete të shumta ku të rinjtë kanë prezantuar talentin dhe aftësitë e tyre në fusha të ndryshme të shkencës dhe artit.