Finlanda anëtarësohet në NATO, dyfishohet kufiri i aleancës ushtarake me Rusinë

Një tjetër flamur i është shtuar sot familjes së Aleancës Euroatlantike. Finlanda bëhet anëtari i 31 i NATO, duke shënuar edhe historinë për procesin më të shpejtë të anëtarësimit.

Shefi i NATO-s, Jens Stoltenberg mirëpriti shtetin nordik duke u shprehur se do të jetë një ditë e mirë për sigurinë e Finlandës, për sigurinë nordike dhe për NATO-n në tërësi.

Procesi i anëtarësimit po vonohet për Suedinë e cila po mbahet peng nga Turqia dhe Hungaria.

Ishte pikërisht pushtimi rus i Ukrainës i cili bëri që Finlanda e Suedia të aplikonin të bëheshin pjesë e NATOS. Aleanca Euroatlantike  e cilëson anëtarësimin e Finlandës një aset.

Ky shtet nordik ndan një kufi prej 1,340 kilometrash me Rusinë dhe ndryshe nga shumica e anëtarëve të aleancës, Finlanda nuk i reduktoi shpenzimet e mbrojtjes pas Luftës së Ftohtë. Ajo ka një ushtri të madhe të mirë stërvitur dhe ka ruajtur një nivel të lartë gatishmërie.

Rusia ka paralajmëruar se do të forcojë forcat e saj përgjatë kufirit finlandez në rast të një dislokimi të trupave të NATO-s në shtetin më të ri anëtar.

Hyrja e Finlandës në NATO përfaqëson një përshkallëzim të ri, duke paraqitur një kërcënim për sigurinë e Rusisë, deklaroi  sot zëdhënësi i Kremlinit, Dmitry Peskov.

LEXO GJITHASHTU:

• Zyrtare| Finlanda anëtarësohet nesër në NATO 
• Sanna Marin mposhtet nga konservatorët e Finlandës në një garë të ngushtë
• ​14 vjet nga anëtarësimi i Shqipërisë në NATO