‘Fleta e votimeve me numra’, Çipa: Votuesit nuk mbajnë mend cili numër i korrespondon kandidatëve

Analisti Aleksandër Çipa ka qëndruar në disa qendra votimesh gjatë ditës së sotme për të evidentuar problematikat që mund të hasen. Një ndër problematikat e raportuara nga z. Çipa lidhet drejtëpërdrejt me fletën e votimit.

Sipas z. Çipa, fleta e votimit ku kandidatët janë paraqitur me numra dhe jo me emra i ka penalizuar këta të fundit, pasi kjo mënyrë votimi ka shkaktuar konfuzion tek votuesit, sidomos te ata që cilësohen si “elektorati gri”. Votuesit e kanë pasur të vështirë të mbajnë mend se cili numër i korrespondon një kandidati të caktuar.

“Pjesa më përcaktuese e elektoratit për qeverisjen në vend është ajo që konsiderohet shtresa gri, ose shtresa e papërcaktuar. Ata nuk kanë një memorie partiake dhe si rrjedhojë e kanë më të vështirë për të kujtuar në momentin e votimit se cili numër korrespondon me filan emër”, u shpreh analisti Çipa.

Këtë konstatim, Aleksandër Çipa e ka arritur nga disa qëndresa të bëra gjatë ditës së sotme në më shumë se pesë pika qendrash votimi.

“Njerëzit nuk mbanin mend numrin rendor të kandidatit preferencial të tyre”, shtoi më tej z. Çipa.