“Fol si në shtëpi”, nga nesër hiqen tarifat “roaming” në Ballkanin Perëndimor

Nga data 1 korrik 2021, qytetarët e Shqipërisë, Bosnjës e Hercegovinës, Maqedonisë së Veriut, Malit të Zi, Kosovës dhe Serbisë, gjatë qëndrimit në njërin nga këto vende, nuk do të paguajnë para shtesë për bisedat telefonike apo mesazhet, apo siç njihet ndryshe shërbimi ‘roaming’.

Heqja e tarifave të telekomunikimit për vendet e Ballkanit Perëndimor u kërkua nga Bashkimi Evropian si formë lehtësimi për komunikimet ndërmjet qytetarëve. Krahas qytetarëve, heqja e ‘roaming’ ndihmon më së shumti edhe sipërmarrësit që udhëtojnë dhe punojnë në vendet e rajonit, në mënyrë që të kenë më të lehtë komunikimin.

Në muajin prill të 2018, në Samitin e parë Digjital të mbajtur në Shkup ishte paralajmëruar ulja e çmimeve të ‘roamingut’ mes vendeve të Ballkanit. Në fazën e dytë që nis zbatimin nga 1 korrik 2021, do të eliminohen tarifat për shërbimet e ‘roamingut’ në vendet e Ballkanit Perëndimor.

Hapi i radhës, sipas Sekretares së Përgjithshme të Këshillit të Bashkëpunimit Rajonal, Majlinda Bregu është nisja e menjëhershme e bisedimeve për të arritur marrëveshje të njëjtë edhe me vendet e Bashkimit Evropian.

“Super arritje e bukur për qytetarët tanë, një nga ato histori suksesi që ndërtohen nga forca e bashkëpunimit! Tani e tutje, ndërsa do të jeni duke udhëtuar në Shqipëri, Mal të Zi, Maqedoninë e Veriut, Serbi, Kosovë dhe Bosnjë e Hercegovinë, kudo brenda Ballkanit Perëndimor, thjesht sigurohuni të karikoni telefonin! Pastaj fol si në shpi kudo të jesh e kurdo të kesh qejf! E meqë këtu e mbajtëm fjalën, hapi tjetër do të jetë zerimi i ‘roaming’ mes Ballkanit dhe BE!” shkroi znj. Bregu në rrjetet sociale.

Sipas Bregut, rreth 80 për qind të trafikut në ‘roaming’, shqiptarët kryesisht e kanë me vendet e Evropës, por më 1 korrik nisim bisedimet për të arritur të njëjtën marrëveshje me BE-në.

Sa ndikon kjo në xhepin e gjithsecilit?! Vetëm mendoni që sot për të njëjtin shërbim, qytetarët në Ballkan paguajnë katër herë më shumë se një qytetar në BE.

LEXONI GJITHASHTU:

• Ministeriali digjital i Ballkanit, Rama: Deri në fund të vitit 95% e shërbimeve do të jenë online dhe falas
• Majlinda Bregu: Këshilli i Bashkëpunimit Rajonal punon për axhendën e tregut të përbashkët mes 6 vendeve të Ballkanit