Fond për autorët e rinj, shpallen fituesit për veprat më të mira

Tre shkrimtarë të rinj janë vlerësuar nga Fondi i Krijimtarisë Letrare për veprat e tyre. Ndryshe nga vitet e tjera, pjesë e listës fituese ishin 2 poezi.

Ministrja e Kulturës, Elva Margariti, u shpreh se të tilla nisma do të vijojnë të jenë në ndihmë të të rinjve.

“Të rinjtë e kanë treguar që kanë entuziazëm, që kanë dëshirë për të shpalosur talentin e tyre. Është një fond i vogël simbolik jo për të lindur talente, por për t’i gjetur dhe pikasur, për t’i shtyrë në rrugën e re”, tha Margariti.

Fituesit thonë ky fond financiar do t’i ndihmojë për botimin e librave të tyre. Ata tregojnë pak detaje nga veprat e tyre.

“Nëse unë vij këtu dhe ia dal këtu, së paku do lexohet poezia. Është një vëllim poetik kushtuar prindërve. Në thelb kanë njeriun dhe atë çfarë i rrethon”, shprehet shkrimtari Alban Tufa.

Midis fituesve ishte dhe një autor nga Kosova.

“Ishte e vetmja mundësi që të bëjmë promovimet diku në letërsinë shqipe. Libri mban titullin ‘Qyteti pa lumë’. Të gjitha kryeqytetet e kanë lumin, Prishtina ka pasur dy lumenj dhe diku rreth viteve ‘70 lumenjtë u mbuluan dhe u ndërtuan rrugë”, thotë shkrimtari Andrin Kabashi.

11 autorë të rinj aplikuan për këtë fond në këtë edicion të tretë.

LEXONI GJITHASHTU:

• Promovohet libri “Illyrian World” i Apollon Baçes, do hedhë dritë mbi historinë
• Libri më i shtrenjtë i të gjitha kohërave? Çfarë e bën kaq të veçantë