Forcat e Armatosura të Polonisë: Dronët rusë përbënin kërcënim real për qytetarët

Forcat e Armatosura të Polonisë kanë reaguar në lidhje me incidentin e fundit, ku dronë rusë fluturuan mbi hapësirën ajrore të Polonisë gjatë një sulmi ajror të Federatës Ruse ndaj Ukrainës.

Në një përditësim të publikuar nga Komanda Operative e Ushtrisë Polake, thuhet se:
“Si rezultat i sulmit nga Federata Ruse në territorin ukrainas, pati një shkelje të paprecedentë të hapësirës ajrore polake nga objekte të tipit dronë.”

Përmes një postimi në platformën X (ish-Twitter), Komanda theksoi se dronët që hynë në hapësirën ajrore të Polonisë “paraqisnin një kërcënim real për sigurinë e qytetarëve polakë.”

Sipas të njëjtit njoftim, në momentin që dronët depërtuan në territorin ajror, u ndërmorën veprime për t’i qëlluar. Aktualisht po bëhen përpjekje për të gjetur vendet e mundshme ku janë rrëzuar objektet.

“Forcat dhe asetet polake dhe aleate mbeten plotësisht të përgatitura për operacione të mëtejshme,” thuhet në deklaratë.

Ndërkohë në një ragim  të tij, Ministri i Mbrojtjes së Polonisë, Władysław Kosiniak-Kamysz, thotë se Forcat e Mbrojtjes Territoriale të Polonisë janë aktivizuar për të kryer kërkime tokësore, me qëllim gjetjen e dronëve të rrëzuar.

Qeveria polake i konsideron këto forca si një “pjesë integrale të potencialit mbrojtës dhe parandalues” të vendit, duke i angazhuar ato në situata të tilla emergjente dhe të sigurisë kombëtare.

Në një postim në platformën X, Kosiniak-Kamysz u bëri thirrje qytetarëve të mos prekin apo marrin asnjë fragment të mundshëm të objekteve të rrëzuara, por të njoftojnë menjëherë policinë.

LEXONI GJITHASHTU:

• Polonia rrëzon dronë rusë në hapësirën e saj ajrore, Tusk: Jemi në kontakt me NATO-n
• Sulmi ajror rus në Ukrainë prek edhe Poloninë, si e kaluan dronët rusë kufirin