Forcat ruse nuk avancojnë në territorin ukrainas, sot takim Biden-Xi Jinping

Ushtria ruse nuk ka mundur të përparojë në territorin ukrainas gjatë 24 orëve të fundit. Por, bombardimet nuk kanë munguar nga ana e ushtrisë ruse, kryesisht në qytetet  Chernihiv, Kiev dhe Mariupol.

Zhvillimet në orët e fundit:

– Të mbijetuarit filluan të dilnin nga rrënojat e një teatri në Mariupolit, i cili u bombardua nga forcat ruse. Numri i viktimave nuk dihet ende. Ministri i Mbrojtjes i Ukrainës e quajti “përbindësh” pilotin rus që bombardoi teatrin.

– Të premten në mëngjes forcat ruse kanë goditur aeroportin e Lviv me gjashtë raketa. Dy nga to u shkatërruan nga sulmet kundërajrore nga qyteti në kufi me Poloninë.

– Këtë të premte presidenti i SHBA Joe Biden dhe udhëheqësi kinez Xi Jinping do të diskutojnë për pushtimin rus të Ukrainës, sipas një deklarate të Shtëpisë së Bardhë. Sekretari i shtypit i Shtëpisë së Bardhë tha se Biden do t’i fliste drejtpërdrejt Xi-t për pasojat e mundshme të ofrimit të ndihmës ushtarake për Rusinë. Thirrja vjen pas pohimeve të fundit nga zyrtarë amerikanë se Rusia i ka kërkuar Kinës mbështetje ushtarake në Ukrainë. Pekini dhe Moska i kanë mohuar pretendimet.

– Rusia vazhdon të përballet me probleme logjistike në sulmet ndaj Ukrainës, tha të enjten Ministria e Mbrojtjes e Britanisë të Madhe.

-Vritet një shtetas amerikan. Amerikani i vrarë në Chernihiv të enjten është identifikuar si James Whitney Hill nga Minesota. Ai ishte në mesin e disa njerëzve të vrarë kur artileria ruse hapi zjarr ndaj civilëve në qytet, sipas zyrtarëve të qytetit.