FOTO/ I akuzuar si porositësi i vrasjes së Klevis Lleshit, kush është Aurel Hoxha

Aurel Hoxha është personi i paraqitur në foto, si porositësi kryesor i vrasjes së Klevis Lleshit në vitin 2020  në Burrel.

Sipas njoftimit të SPAK, Aurel Hoxha ka porositur vrasjen e të riut kundrejt pagesës prej 50 mijë eurosh në shenjë hakmarrje për vëllain Agim Hoxha në Angli. Sabah Nuzi ka qenë ekzekutori.

Klevis Lleshi nga Burreli u zhduk më 5 gusht të vitit 2020 . Në shkurt të vitit 2023, erozioni nxori në sipërfaqe disa eshtra, të groposura në fshatin Shpërdhet të Mamurrasit. Analizat e ADN-së zbuluan se i përkisnin të riut të zhdukur. Dy vite më pas, të premten e 26 shtatorit 2025, SPAK zbulon autorët dhe lëshon 4 urdhërarreste, 3 prej të cilëve u ekzekutuan. Ekzekutori Sabah Nuzi dhe Samet Loka, të dy 31 vjeç, u arrestuan në vendin tonë, ndërsa ndihmësi Sajmir Kolaveri është arrestuar në Itali.